arin JS
Home page Ad

साँस्कृतिक थाय् हरिसिद्धि जलय् स्वपु म्येया पितब्वज्या

Jheegu Sah – Jheegu sah,    २०७८ फाल्गुण २९, आइतबार    वर्गीकृत मनोरञ्जन

यलया साँस्कृतिक व एतिहासिक नगरी हरिसिद्धि जलय् शनिवार छगू तःजिगु ज्याझ्वःया दथुइ स्वपू म्येया पितब्वज्या जूगु दु ।  शिलाचर्हे पाहाँचर्हे , स्वाँया वासना व छंगु रुप खना बोलया स्वपू थी थी म्येया म्युजिक भिडियो पितब्वज्याय् नेपालभाषाया न्हापांम्ह म्युजिक भिडियो निर्देशक सिने पत्रकार विजयरत्न असंबरे मूपाहाँ कथं झायादीगु खः ।

जलया नांजाम्ह तबला गुरु निरन्जन महर्जनया सभानायसुइ न्ह्याःगु पितब्वज्या ज्याझ्वलय् विशेष पाहाँपिं समता संगीत साधना केन्द्रया तुलसी महर्जन , हरिसिद्धि भजन मण्डलया सचिदानन्द महर्जन, समाजसेवी महेन्द्र श्रेष्ठ व   मंगल महर्जन  , नांजाम्ह संगीतकःमि जिवित जल्मी लगायत पितब्वज्या जूगु म्येया म्येहालामिपिं अशोक महर्जनं व राजेन्द्र महर्जन पिन्सं नुगःखँ तयादीगु खः।

नुगःखँ तयेगु झ्वलय् मूपाहाँ  असंबरें नेपालभाषाया सांगितिक व साँस्कृतिक ख्यलय् हरिसिद्धि जलया कलाकःमि पिनिगु ज्वमदुगु योगदान दु धका धयादिसे आःया कलाकारिता आर्थिक समृद्धिया  निंतिं जुइमाल धका धयादिल ।

ज्याझ्वलय् पितब्वज्या जुउगु स्वपू म्ये मध्ये शिलाचर्हे पाहाँचर्हे बोलया म्ये म्येहालामिपिं अशोक महर्जनं व राजेन्द्र महर्जन पिन्सं हालातःगु खःसा विष्णु जल्मीं  च्वयादीगु व लसय् हनादीगु खः   ।

थ्व म्येय्  निरन्जन महर्जन कुमारीया संगीत संयोजन,किपालुमि रबिन डंगोल , निर्देशन व सम्पादन बी के जल्मीं यानादीगु खःसा थुके विश्वनाथ महर्जन,विक्रम महर्जन लगायतया कलाकारपिन्सं म्हितातःगु दु ।

स्वांया वासना म्ये अशोक महर्जन काकें हालातःगु खःसा म्येच्वमि कृष्णराम महर्जन,संगीत निरन्जन महर्जन कुमारी,किपालुमि व सम्पादन बी के जल्मी,कोरियोग्राफि व निर्देशन सुरज नापित खःसा थुके किशोर चिपालु व रोजिना सुवाल, रविन डंगोलया अभिनय दु ।

छंगु रुप खना बोलया म्ये राजेन्द्र महर्जन व दिपा महर्जनं हालातःगु खःसा म्ये च्वमि व लय चिनामि निरन्जन महर्जन कुमारी,किपालुमि व छ्याय्फ्वायकःमि सोहन मानन्धर, कोरियोग्राफि आराध्य लक्ष्मी खडगीं यानादीगु थ्व म्येय् राजु महर्जन , आराध्य लक्ष्मी खडगी व पूर्णकाजी ज्यापु या नापनापं कलाकार मोडल व कोरियोग्राफर आराध्य लक्ष्मीया  मां सुर्जलक्ष्मी अबु राम खडगी अले मचा कलाकारपि समर्पण गमाल व रोजिशा बलामि पिन्सं अभिनय यानादीगु  थुकिया निर्देशन जितेन्द्र महर्जनं यानादीगु खः । 

 

Detail page ad