arin JS
Home page Ad

सफू ह्यःमि व साहित्यकारपिनिगु स्वापु खः सफू ब्वज्या न्ह्यात - चान्सलर धाख्वाः

Jheegu Sah – Bijay Ratna ,    २०७९ श्रावण २६, बिहिबार    वर्गीकृत समाज

      नेपालभाषाया साहित्य व संस्कृतिया ख्यलय् सना वया च्वंगु न्यागु संस्था च्वसापासा, नेपालभाषा एकेदेमी, ईलोहं प्रकाशन, कुतः पिकाक व नागार्जुन पब्लिकेशनया मंकाः ग्वसालय् नेपाल एकेडमी, प्रज्ञा भवन, कमलादीस छगू तःजिगु सफू ब्वज्या शुरु जुउगु दु  । उगु सफू ब्वज्याया विहिबार नेपालभाषा एकेडेमीया चान्सलर यज्ञरत्न धाख्वाःजुं त्वादेवाय् मत च्याका उलेज्या यानादिल ।
 
 थुगु सफू ब्वज्याया बारे जानकारी बिसे इलोहँ प्रकाशनया प्रबन्ध निर्देशक  भाषाह्यःमि नरेशबीर शाक्यं नेपालभाषाया पुलांगु पुलांगुनिसें न्हूगु सफूया ब्वज्याय् ब्वँनामितय्त  म्होतिं नं झिब्व (१० प्रतिसत) लिसें थप आकर्षक छुट बियाः सफू मीगु ग्वसाः दु धका धयादिल । उकथं हे नेपालभाषाया न्हापा पिदनाच्वंगु, बजारय् मदयेधुंकूगु सफूत नं नीन्यातका व न्येतकाया निगू स्टलय् मीगु ग्वसाः दउगु खँ नं ग्वसाः खलकं जानकारी बिउगु दु ।
 
ग्वसाः खलकं बिउगु जानकारी कथं प्यन्हुयंकं जुइगु सफू ब्वज्याया ज्याझ्वलय् न्हमपमंगु न्हि ने.सं. ११४२ गुंलाथ्वः चतुदर्शी, बिहिवाःखुन्हु  उलेज्या जुउगु ग्वसाः सफू ब्वज्याय् निन्हु खुन्हु ने.सं. ११४२ गुंपुन्हि,  शुक्रवाः कविरत्न सिद्धिचरण श्रेष्ठया सीस्वां , फूस्वां व भूषणप्रसाद श्रेष्ठया छन्द ७७ व नेवाः गजलया पितब्वज्या जुइगु जूगु दु ।
 
  स्वन्हु खुन्हु ने.सं. ११४२ गुंलागाः सापारु, शनिवाः नःलि साहित्य दबूया ग्वसालय् छगू साहित्यिक मुँज्या जुइगु ग्वसाः दुसा उगु साहित्यिक मुँज्याय् नेपालभाषाया साहित्य ख्यःया पुलांपिं नांजाःपिंनिसें न्हूपुस्ताया साहित्यकारपिनिगु ब्वति दइगु खँ नं ग्वसाः खलकं जानकारी बिउगु दु ।
 
नेपालभाषा एकेडेमीया चान्सलर धाख्वाःजुं थज्यागु सफू ब्वज्याया नेपालभाषा एकेडेमि पाखें दय्ँदसं यानागुलिइ कोरोनाया ग्याचिकुया हनिं जुउगु लकडाउनया कारणं दिना च्वंगुलिइ थुगुसिइ थथे मंका कथं जुउसां ब्वज्या याये खंगु खँ यात च्वछाया दिल । थज्यगु ब्वज्या नेपालभाषाया सफू ह्यःमि व साहित्यकारपिनिगु निंतिं ज्वःमदुगु ज्याझ्वः जूगुलिं इलय् ब्यलय् थथे सफू ब्वज्या याना च्वनेमा धका नेपालभाषा एकेडेमीया चान्सलर यज्ञरत्न धाख्वाःजुं धयादिल ।
Detail page ad