arin JS
Home page Ad

संस्कृति व सम्पदा संरक्षणया मदिकेत मेयर शाक्य प्रतिबद्ध

Jheegu Sah – Bijay R,    २०७८ आश्विन ६, बुधबार    वर्गीकृत समाज

नेवाः पत्रकार राष्ट्रिय दबुपाखें बाग्मती प्रदेशया आन्तरिक मामिला तथा कानूनी मन्त्री नियुक्त जुयादीगुलिं डा अजयक्रान्ति शाक्यया भिन्तुना देछायेगु व संस्कृति सम्पदा संरक्षणय् प्रदेश व स्थानीय तहया भूमिका यात कया सहलह यायेगु तातुना छगू ज्याझ्वः यागु दु ।

उगु ज्याझ्वलय् काठमाडौं महानगरपालिकाया मेयर विद्यासुन्दर शाक्यं दाँ या अभावया कारणं संस्कृति व सम्पदा संरक्षणया ज्या दिकेमखु धका धयादिल ।महानगरपालिकाय् जनप्रतिनिधि वयेधुंका भाषा, संस्कृति व सम्पदा संरक्षणया खँयात उच्च प्राथमिकताय् तया बजेट विनियोजन याना वया च्वनागु खँ मेयर शाक्यं कनादिल ।

उगु ज्याझ्वलय् बागमति प्रदेशया नव नियुक्त आन्तरिक मामिला तथा कानुन मन्त्री डा शाक्यं थःम्हं भाषा, संस्कृति संरक्षणया एजेण्डा ज्वना राजनीतिक यात्रा शुरु यानागु खँ लुमंकुसे बागमति प्रदेश थ्व खँय् सदां न्ह्यःने लाइ धका प्रतिबद्धता व्यक्त यानादिल ।

नेपालया संघीयताया अभ्यासयात क्वातुका यंकेगु ज्याय् थःम्हं सदां पलाः न्ह्याका च्वने धका नं धयादिसे मन्त्री शाक्यं काठमाडौं महानगरपालिकां संस्कृति व सम्पदा संरक्षणय् यक्व ज्या याना च्वंगु दु धका धयादिल ।

उगु ज्याझ्वलय् नेवाः पत्रकार राष्ट्रिय दबूया केन्द्रीय अध्यक्ष सुरजबीर बज्राचार्यं मेयर शाक्यं संस्कृति सम्पदा संरक्षणया ज्याय् स्थानीय तहपाखें गुकथं क्वातुक्क पलाः ल्ह्वने फइ धइगु खँय् येँ महानगरपालिका छगू बाँलागु दसु जुया बिउगु दु धका धयादिल ।अध्यक्ष बज्राचार्यं भाषा, संस्कृति, सम्पदा संरक्षणय् महानगरपालिकाया भूमिकायात ऐतिहासिक ज्या धका नं च्वछायादिल ।

वयकलं प्रदेश सरकारपाखें मातृभाषाया पत्रकारिता व समावेशी सञ्चारया निंतिं प्रदेश सरकारं ल्ह्वने माःगु थीथी पलाः यात कया मन्त्री शाक्य समक्ष ध्यानाकर्षण पौ नं लःल्हाना दिल ।

उगु ज्याझ्वःया संयोजन भाला क्वबिया दीम्ह नेवाः पत्रकार राष्ट्रिय दबु वरिष्ठ उपाध्यक्ष नृपेन्द्रलाल श्रेष्ठं महानगरपालिकापाखें येँय् विद्यालयस्तरय्ने पालभाषाया माध्यमं शिक्षा बिइगु नीति लागू याना युगान्तकारी ज्या यागु दु धका धयादिल ।

उगु ज्याझ्वलय् मन्त्री डा शाक्य व नेवाः पत्रकारत दथुइ छगू बिस्कं सहलह नं जुउगु खःसा  उकिं बाँलागु लिच्वः बिइगु खँय् नेवाः पत्रकारिता ख्यः तसकं आशावादी धका ग्वसाखलः सुत्रं धाःगु दु ।

Detail page ad