श्रीघलय् हारती अजिमाया देगः या जग स्वन
Jheegu Sah – Bijay Ratna , २०७८ माघ ४, मंगलबार वर्गीकृत तजिलजि
श्रीघःबहाया नामं नांजागु श्रीशान्तिघट बज्रधातु चैत्य महाविहारय् च्वंगु हारती अजिमा द्यःया देगःया पुनर्निमाणया झ्वलय् जग स्वनेगुज्या मंगलबार जूगु दु ।
काठमाडौँ महानगरपालिका वडा नं २५ श्रीघःबहाया हारति अजिमाद्यःया देगःया येँ महानगरपालिकाया मेयर विद्यासुन्दर शाक्यं जग स्वनादीगु खः ।
देगः पुनर्निमाणया झ्वलय् जूगु सकतां पुजा विधिया ज्या गुरु यज्ञमानपति बज्राचार्यया नेतृत्वय् गुरुजु दिनेश बज्राचार्य लगायतं पुजा याना वया बिज्यागु खँ श्रीशान्तिघट बज्रधातु चैत्य महाविहार संरक्षण समितिया नायः शुभकाजी शाक्यं जानकारी बियादिल । मङ्गलबार जुउगु जगस्वने ज्याय् उगु श्रीशान्तिघट बज्रधातु चैत्य महाविहारया थायपा आजु सकारात्मक सोचया न्ह्यलुवा नांजाम्ह पर्यटन व्यवसायी कर्ण शाक्यया नं उपस्थिति दुउगु खः ।
देगः पुननिर्माणया निंतिं येँमहानगरपालिकापाखें आर्थिक खर्च याइगु खँ दुसाः थुके श्रीशान्तिघट बज्रधातु चैत्य महाविहार संरक्षण समितिया उपभोक्ताकातर्फं ५ प्रतिशत दाँ खर्चभारया भाला क्वबिइगु खँ दु ।
जगस्वने ज्या यानादीम्ह मेयर शाक्यं इतिहासयात म्वाका तयेया निंतिं प्राचीन स्मारकया मर्मत, सम्भार, जीर्णोद्धार व पुननिर्माणया ज्यायात येँ महानगरपालिकाया नीतिगत प्रबन्ध, बजेट व कार्यक्रमपाखें जुयाच्वंगु खँ कनादिल । हारती अजिमाया देगः पुननिर्माणया खँय् मेयर शाक्यं थुगु देगःया सिं पुलाँ जुया दुनेदुनें ध्वगिना वये धुंकुगु व पःखाः नं छ्वासुयावःगुलिं परम्परागत निर्माण सामग्रीे छ्यला पूर्ववत स्वरुप व शैलीइ तयार जुइकथं उपभोक्ता समिती , गुठीयार व द्यःपाला शाक्यसंघलिसे सहलह याना पुननिर्माणया ज्या ँजूगु न्ह्यथनादिल ।
उपभोक्ता समितीया पुरन शाक्याया धापु कथं श्रीघःया हारति अजिमाया देगः करीब स्वसःदँ पुलाँगु खःसा थ्व देगःया पुननिर्माण करीव १ सय ५६ बर्ष न्ह्यः नं जुउगु खँ अभिलेखय् च्वयातःगु दु ।
वि सं १९९० सालया तःभूखाय्या धक्कां छुं मजुउगु देगः २०७२ बैशाख १२ या धक्कां धाःसा दुनेदुनें स्यनावना च्पंगु खँ नं पुरन शाक्यं कनादिल । जगस्वलने ज्याय् वडा २५ या अध्यक्ष एवं विपद व्यवस्थापन समितिया संयोजक नीलकाजी शाक्य, कार्यपालिका सदस्य रमिताकमल स्थापित सहित जनप्रतिनिधि व संरक्षण समितिया पदाधिकारीनिनिगु सहभागी दूगु खः ।
किपा दिनेश शाक्य
