arin JS
Home page Ad

शान्तराज शाक्ययात प्रधान सिरपा

Jheegu Sah – Bijay ,    २०७८ भाद्र ६, आइतबार    वर्गीकृत साहित्य

नेपालभाषाया साहित्य व सन्चारख्यलय् लःल्हाना वया च्वंगु प्रधान सिरपा थुगुसिइ साहित्यकार शान्तराज शाक्ययात शनिवार छगू ज्याझ्वःया दथुइ लःल्हागु दु ।  साहित्यकार शाक्ययात वयकलं फेसबुकया माध्यमं येइपुक बाखं कना नेपालभाषाया साहित्यया विकासय् ज्वमदुगु योगदान बियादीगुलिं थ्व सिरपां छायपिइगु ज्या जुउगु खः ।

थ्व सिरपा साहित्यख्यलय् नांजाम्ह अमर साहित्यकार मन्दिरा प्रधानं पीच्यादँ न्ह्यः झी प्रधान सिरपा का निस्वनादीगु खःसा छुं ई दिनादिना न्ह्याना च्वंगु खः । थ्वहे झ्वलय् थ्व सिरपा नःलि प्रधान सिरपाया रुपय् नं न्ह्याःगु खः । नःलि प्रधान सिरपाया यात्रा नं ताः ई न्ह्याये मफुत । प्यदँ न्यादँति न्ह्यः साहित्यकार एवं सन्चारकःमि पुष्कर माथेमायात प्रधान सिरपा नं छाय् पियागु व धुंका थ्व सिरपा हाकनं द्युगु खँ थ्व सिरपाया दाता मन्जुर प्रधानं कनादिल । साहित्यकार शाक्यं सिरपा लःल्हाना काये धुंका नुगःखँ तयेगु झ्वलय्  लकडाउनया इलय् न थःगु फुर्सदया इलय्  फेसबुकपाखें बाखं न्यंकेगु यानावया च्वंगु खः न्हयथंसे नियमित रुपं  विश्वप्रसिद्ध बाखं, नेपालभाषाया लोकबाखं, ऐतिहासिक बाखं वाचन व शैली यक्व हे न्यँमिपिनिगु नितिं न्यंकेमाधका जक न्यंकागु खः , थथे न्यंका सिरपालं छायेपिके खनि धका मति मतया धका धयादिल । लकडाउनं आपाःसिगु नितिं समस्या बिल , दुःख बिल तर,थःगु निंतिं धाःसा ह्वःताः जुल अले फुर्सदया ईयात फेसबुक माध्यमयात छ्यलाः बाखं कनेगु न्ह्याकाबलय् शुरुइ न्यँमिपिन्सं गुकथं काइ धइथें ताःगु खः तर लिपा वःगु प्रतिक्रियां थयात तसकं उत्साहित दय्कल धका धयादिल ।वयक मदुम्ह साहित्यकार मन्दिरा प्रधान या काय् भाजु खः । मन्जुर प्रधानया सभानायसुइ यलया चेम्बर अफ कमर्शया सभाकक्षय् जुउगु ज्याझ्वलया साहित्यकार शान्तराज शाक्ययात झिद्वःतका दाँ या नापनापं हनापौ देछागु खः । ज्याझ्वलय् प्रधान सिरपा ग्वसाः कजि सुरेन्द्र भक्त श्रेष्ठं थ्व सिरपा आः दँय्दसं न्ह्याइगु खँ कनादिल । अथेहेतुं नेवाः पत्रकार राष्ट्रिय पत्रकार दबूया मूछ्यान्जे सुनिल महर्जनं सिरपा कयादीम्ह व्यक्तित्व शाक्यया म्हसिका न्ह्यब्वयेगु झ्वलय् वयक ई यात ल्वकथं बाखं कनेसःम्ह साहित्यकार खः धका धयादिल ।

ज्याझ्वलय्  नेवाः पत्रकार राष्ट्रिय पत्रकार दबूया सल्लाहकार वरिष्ट पत्रकार विजयरत्न असंबरें साहित्यकार शाक्य या बाखं कनेगु कलाया तारीफ यानादिसे संक्रमणया  ग्याःचिकुया दथुइ छेँय् हे कुंकाः च्वनेमाःबलय् शाक्यं फेसबुकया माध्यमं साहित्यया श्रीवृद्धिया लागिं बियादीगु योगदानयात च्वछानादिगु खः ।

उगु सिरपा लःल्हायेगु ज्याझ्वलय् नेवाः पत्रकार राष्ट्रिय पत्रकार दबूया वरिष्ट न्वकु नृपेन्द्र लाल श्रेष्ठ, यलया चेम्बर अफ कमर्शया पुलांम्ह नायः अजरमान जोशीया नं उपस्थिति दुगु खःसा कोरोना जोखिमया कारणं ज्याझ्वलय् म्होजक पाहाँपिन्त ब्वनातःगु खःसा ज्याझ्वः लहनान्युजडटकमया  फेसबुकपाखें लाइभ याःगु खः ।

Detail page ad