arin JS
Home page Ad

शंखधर साख्वाः दिवसया झ्वलय् राकेश महर्जनया ‘धुक्‌धुक् धुक्‌धुक्’ पितब्वज्या

Jheegu Sah – Bijay Ratna ,    २०७८ कार्तिक २९, सोमबार    वर्गीकृत समाज

नेपालसम्बत न्हूदँ राष्ट्रिय समारोह समिति ११४२ या इनापय् येँ महानगरपालिका २५ व २८ वडाया स्थानीय खलः, पुचःतय् ग्वसालय् जूगु शंखधर दिवस हना ज्याझ्वः जुउगु दु । तःजिक जुउगु उगु हे ज्याझ्वलय् बाखंच्वमि भाजु राकेश महर्जनया ‘धुक्‌धुक् धुक्‌धुक्’ सफूया नं पितब्वज्या जुल ।
 
न्हूदँ समारोह समितिया नायः निरञ्जनरत्न शाक्यया सभापतित्वय् जूगु ज्याझ्वलय् शाक्यलिसें नेवाः न्ह्यलुवाः  नेपालभाषा एकेडेमीया सदस्य सचिव मल्ल के. सुन्दर, नागार्जुन पब्लिकेशनया नायः डा. सर्वोत्तम श्रेष्ठ व साहित्यकार नारद वज्राचार्यं मंकाःकथं सफू पितब्वज्या यानादीगु खः । उगु सफू नागार्जुन पब्लिकेशनया लुखां पिदंगु  खः ।
 
पितब्वज्या जुउगु सफूया विषय न्ववानादिसें साहित्यकार बज्राचार्यं नेपालभाषाया बाखं साहित्यय् न्हूगु प्रयोग ज्वनाः सफू पिदंगु दु धयादिल । नेपालभाषा बाखं साहित्यय् थौंकन्हय् मनोविश्लेषणात्मक बाखं च्वयेगु म्हो जुयावंगु इलय् थ्व ह्याकिं पूवंकेत भाजु महर्जन झाःगु व मनोविश्लेषणात्मक बाखं ख्यलय् छगू ग्यसुग्यंगु बाखंसफूकथं थुकियात कायेज्यूगु खँ साहित्यकार बज्राचार्यं तयादीगु दु । शंखधर साख्वाःयात सामाजिक कल्याणया प्रतीककथं कयाः हे राष्ट्रिय विभूति घोषणा जूगु सकल अभियन्तातय्‌सं ध्वाःथुइमाःगु खँ नेवाः न्ह्यलुवाः मल्ल के. सुन्दरं कनादीगु दु ।
 
शंखधर दिवस हनेगु झ्वलय् येँया शंखधर पार्कय् आइतवाः जुउगु छगू ज्याझ्वलय् विशेष पाहांकथं थःगु मन्तव्य तयादीसें मल्ल के. सुन्दरं गथे भगवान् बुद्धयात विश्व शान्तिया दूतकथं कयाः संयुक्त राष्ट्र संघं विश्व शान्तिदुत   घोषणा यात, अथे हे शंखधर साख्वाःयात नं संयुक्त राष्ट्र संघं सामाजिक कल्याणया प्रतीककथं कायेकेगु निंतिं कुतः यायेमा धका नं धयादिल । थ्व खँ सकल नेपालसम्बत आन्दोलनकथं न्ह्याकाच्वंपिंसं ध्वाथुइकेमाःगु खँ खः धका मल्ल के. सुन्दरं धयादिल ।नेपालसम्बत या प्रवर्तक शंखधर साख्वाःयात राष्ट्रिय विभूति घोषणा याःगु दिं कछलाथ्व १० यात शंखधर दिवसकथं हनावयाच्वंगु दु ।
 
ज्याझ्वलय् शंखधर साख्वाःया किपा अंकित कपि नं पितब्वज्या जूगु खःसा ज्याझ्वलय् जगतसुन्दर ब्वनेकुथि मा.वि.या प्रिन्सिपल सुनिता मानन्धरलिसें ब्वनेकुथिया ९ व १० तगिंया विद्यार्थीपिनि नं ब्वति दुगु खः । उपस्थित पाहांपिंसं विद्यार्थीतय्‌त अन पितब्वज्या जूगु कपि नं लःल्हाःगु खः ।ज्याझ्वलय् २५ वडाया समाजसेवी रोशनकाजी तुलाधरं लसकुस न्वचु तयादीगु खःसा २५ वडाया वडासचिव परिबेश वज्राचार्यं सुभाय् बियादीगु खः ।शंखधर साख्वाःया तस्बिर दुगु बेलुन ब्वयेकाः न्हूकथं उलेज्या जूगु उगु ज्याझ्वः क्वचायेकाः पार्कय्  शंखधर दिवसया लसताय्  पाल्चा मत नं च्याकुगु खः ।
Detail page ad