arin JS
Home page Ad

विराट साहत्य सम्मेलनय् येँया मेयर शाक्य व एमए परिक्षाय् अप्वः ल्याः हःम्ह शाक्ययात सम्मान

Jheegu Sah – विजयरत्न,    २०७८ कार्तिक १, सोमबार    वर्गीकृत साहित्य

 जातीय स्वतन्त्रतायात क्वत्यलाः राष्ट्रया उत्थान जुइ फइमखु धइगु नारा ज्वना ख्वीक्वःगु बिराट नेपालभाषा साहित्य सम्मेलन ख्वपय् क्वचागु दु।मूपाहाँ कवयित्री प्रतिसरा साय्मिं त्वाःदेवाय् मत च्याकाः सम्मेलनया उलेज्या यानादीगु उगु ज्याझ्वः बिराट गुथिया नायः महेन्द्रगोपाल कर्माचार्यया सभापतित्वय् उगु जूगु खः ।

उगु सम्मेलनय् येँ देय् म्हसीका पाठ्य सामग्री तयार यानाः येँ महानगरपालिकां नेपालभाषाया माध्यमं थःपिनि लागाय् अनिवार्य रुपं नेपालभाषा विषय पठन पाठनया ब्यवस्था याःगु ज्वःमदुगु योगदानया निंतिं येँ महानगरपालिकाया मेयर बिद्यासुन्दर शाक्ययात सम्मान याःगु दु।

येँ महानगरया मेयर शाक्ययात बिराटया पुलांम्ह नायः व सल्लाहकार डा. योगेन्द्र प्रधानं दोसल्लां न्ययेकाः अले  नायः महेन्द्रगोपाल कर्माचार्य व मूपाहां प्रतिसरा साय्मिं हनापौ लःल्हानादिगु खः। उगु ज्याझ्वलय् सम्मानित ब्यक्तित्व येँ महानगरपालिकाया मेयर शाक्यं राज्यं हे यायेमाःगु चिकिचाधंगु ज्या जकं थःपिसं यानागु खँ कनादिसें भाषा, जातिया सवालय् सुरुं छुं यायेत तसकं हे थाकुइगु तर बुलुहुँ लँ चाला वनेवं धाःसा अज्याःगु ज्या स्वर्तस्फूर्त रुपं जूवनीगु धका धयादिगु खः। सम्मेलनय् नेपालभाषा विषय कयाः एम.ए.तगिमय् उत्कृष्ट ल्याः हयाः पास यानादीम्ह प्रजित शाक्य व एसइइ परीक्षाय् नेपालभाषाय् दक्कलय् अप्वः ल्याः हयाः पास यानादीम्ह सदीक्षा महर्जनयात मध्यपुर थिमि नगरपालिकाया मेयर मदनसुन्दर श्रेष्ठं दोसल्लां न्ययेकाः हनेज्या यानादीगु खः।

उगु हे ज्याझ्वलय् बिराटया छेँय् दनेत तुल्सीराम श्रेष्ठपाखें स्वंगू लाख तका व संघरत्न शाक्यपाखें छगू लाख तका दां लःल्हाःगु खः। मूपाहां थःम्हं च्वयादीगु पुलांगु कविता लुमन्तिया अगिंमथ ब्वना न्यंका न्ह्यादीगु सम्मेलनय् जजुकाजी रंजित व सत्यनारायण मानन्धरपिसं म्ये न्यंकादीगु खःसा संगीतज्ञ अमरराज शर्मा, बद्री बेदना, दिब्या ताम्राकार,बुद्धिकुमार घों, अगिब बनेपाली, सुरेन्द्रलाल भुजू,नरेश अमात्य,ज्ञानीराजा मानन्धर,कृष्णभक्त बोडे, लगायतं थः थःगु रचना ब्वना न्यंकादीगु खः ।

ज्याझ्वलय् बिराटया ख्वाःपौ ह्याउँबालाया न्हूगु ल्याः नं विमोचन जूगु खःसा बिराटया ज्यासना पुचःया दुजः बाबुकाजी सुवालया गांगु सिमा नांगु चिबाखं मुनाः नं पितब्वज्या याःगु खः ।

 

 

 

Detail page ad