arin JS
Home page Ad

वडा अध्यक्ष महर्जनया म्येया म्यूजिक भिडियो प्रिमियर जुल

Jheegu Sah – Rajeev Rajopadhyaya,    २०७८ आश्विन २, शनिबार    वर्गीकृत मनोरञ्जन

येँ महानगरपालिका १८ वडाया वडा अध्यक्ष न्हुच्छे काजी महर्जनया च्वसां पिज्वःगु निपु म्येया म्यूजिक भिडियोया प्रिमियर जूगु दु ।

१८ वडाया सभा हलय् छगु ज्याझ्वःया दथुइ प्रिमियर जूगु निपु म्ये मध्ये छपू खस नेपाली भाषाया किन दुख्न थाल्यो बोलया खसा नेपाल भाषाया बुदिंया भिन्तुना बोलया म्ये खः ।

म्ये च्वमि न्हुच्छे काजी महर्जनया सभापतित्वय् जूगु उगु ज्याझ्वलय् येँ महानगरपालिकाया प्रमुख मेयर विद्या सुन्दर शाक्यजु मूपाहाँ कथं झाःगु खः ।

मूपाहां मेयर शाक्यं प्रिमियर यानादीगु उगु ज्याझ्वलय् साहित्यकार व समाजसेवी बालकृष्ण सजिव, नांजाम्हः कलाकार सविन शाक्य पाहाँ कथं झायादीगु खः ।

प्रिमियर जूगु किन दुख्न थाल्यो म्येय् स वियादीम्हः राजेन्द्र शाक्य खःसा लय् चिनामि अनिल तुलाधर खः ।

थ्व म्येय् रविना शाक्य, राजेन्द्र कुमार महर्जन ‘राजी किपू’ अले न्हुच्छे काजी महर्जन व राजेन्द्र शाक्य पिन्सं अभिनय यानादीगु दु ।

वरिष्ठ निर्देशक पवन जोशिजु निर्देशन यानदीगु थुगु म्येया किपालुमि सोहन मानन्धर खः । अथेहे बुदिंया भिन्तुना म्येया लय् चिनामि रिता महर्जन खःसा थुकिइ सः वियादीपिं संगिता शाक्य व रिता महर्जन खः ।

सम्पादन व निर्देशन सुरेन्द्र महर्जनं यानादीगु थुगु म्यैया किपालुमि शैलेश श्रेष्ठ लुभु खः ।

थुगु म्येय् म्ये च्वमि स्वयं न्हुच्छे काजी महर्जनया नाप नापं अनिस महर्जन, रेनुसा महर्जन, अनिना महर्जन, लिजला श्रेयसी, सानुछोरी अले सानुमैयाँपिन्सं अभिनय यानादीगु दु ।

वडा सदस्य शोभा महर्जनं न्ह््याकादीगु थुगु प्रिमियर ज्याझ्वलय् म्यूजिक भिडियोया निर्देशकपिं पवन जोशी व सुरेन्द्र महर्जन थः थःगु नुगः खँ तयादिल ।

नुगः खँ तयेगु झ्वलय् पाहाँ बालकृष्ण सजिव जुं थुगु वडा तसकं नां जाःपिं कलाकारपिं दुगु महत्वपूर्णगु वडा खः धासें प्रिमियर जूगु म्येयात भिन्तुना नं वियादीगु दु ।

अथेहे मूपाहाँ मेयर भाजु शाक्यं थः मचाबलय् मचाः पुचः निस्वनाः कलाकार क्षेत्रय् यक्वः ग्वाहाली यानागु लुमंकुसे म्ये च्वमि महर्जन सदां बांबांलाःगु ज्याय् न्ह््याना च्वनेमा धकाः भिंतुना नं वियादील ।

Detail page ad