arin JS
Home page Ad

ललितपुर वडा १६ य् फिजियोथेरापी उपचार केन्द्रया स्थापना

Jheegu Sah – Bijay Ratna ,    २०७९ कार्तिक २६, शनिबार    वर्गीकृत पुलुपालु

          ललितपुर महानगरपालिका– १६ वडायात  स्वास्थ्य क्षेत्रया नमूना वडा दयेकेगु योजना कथं ईलाननीइ छगू फिजियोथेरापी केन्द्र चायेकुगु दु ।
 
रचना आयुर्वेद तथा अर्थो न्यूरो रिहाबिलिटेशन व ईलाननी टोल सुधार समितिलिसे जाना यलया ईलाननीइ चायेकुगु ईलाननी रचना फिजियोथेरापी उपचार केन्द्र शनिबार छगू ज्याझ्वःया दथुइ  वडाध्यक्ष निर्मलरत्न शाक्यं उलेज्या यानादिल ।
 
वडाअध्यक्ष शाक्यं छगू फिजियोथेरापी केन्द्रया सञ्चालन यायेगु योजना थःम्हं स्वदँ न्ह्यः दयेकागु खँ धासे आः वया थगु योजना कथं फिजियोथेरापी केन्द्र सञ्चालनय् हयेखन धका धयादिल । थ्व केन्द्र स्थापनां समुदायस्तरय् स्वास्थ्य सेवाया सहज जुइगु खँ नं वडाअध्यक्ष शाक्यं धयादिल ।
 
ज्याझ्वलय् रचना रिहाबिलिटेशन सेन्टरया डा चन्द्रदीप महत्तों थन क्वें ल्यःपिं , नशा च्यापेजूपिं,  जोर्नीया समस्यादुपिं, प्यारालाईसिस, ल्हातुति पोलेजूपिं व सुस्त मनस्थितिया मस्तये सहुलियत दरय् उपचार जुइगु जानकारी बियादिल ।
 
टोल सुुधार समिति भवनय् प्यंगु शैय्यासहित फिजियोथेरापीया हलंज्वलं तया केन्द्र सञ्चालनय् हःगु दुसाः थुकिया निंतिं वडापाखें २० लखतका फ्यानातगु  । समितिया अध्यक्ष राज बज्राचार्यं स्वास्थ्य सेवा क्षेत्र  विस्तार यायेगु वडाया उद्देश्य पुरा यायेत थःपिं लगेजुया च्वनागु खँ कनादिल ।
 
उगु ज्याझ्वलय् वडा सदस्य बबिता श्रेष्ठ, वडा समिति सल्लाहकार धर्मेन्द्र शाक्य लगायतं  स्वास्थ्य सेवाय् १६ वडा पाखें जुया वया च्वंगु ज्या व आः   याये मानिगु ज्यायात कया नुगःखँ तयादिल ।
Detail page ad