arin JS
Home page Ad

रुपेन्द्र थक्वाःया निर्देशनय् हिरा लानी वइगु

Jheegu Sah – Bijay ,    २०७८ श्रावण १४, बिहिबार    वर्गीकृत मनोरञ्जन

 
निक्वःगु लकडाउन लिपा नेपालभाषाया संगीतख्यलय् म्युजिक भिडियो धमाधम न्हून्हूगु पिहाँ वया च्वंगु दु । म्युजिक भिडियो ख्यलय् आपालं कलाकःमिपिनि ल्हाःदिइ मलाना च्वंग दु । थथे लिमलाना च्वनिम्ह छम्ह कलाकःमि रुपेन्द्र श्रेष्ठ थक्वाः नं खः । वयकया ला परिवारय् जहान सरिना बज्राचार्य व म्ह्याय्पिङ सिम्रिक व संकिपा श्रेष्ठ  नं   कलाकारिताख्यलय् थःगु पलाः न्ह्याका च्वंपिं खः । कलाकःमि रुपेन्द्र श्रेष्ठ थक्वाःजुं   निक्वःगु लकडाउन लिपा नेपालभाषाया म्युजिक भिडियोख्यलय् हाकनं पलाः न्ह्याकुगु दु । छम्ह अभिनेता व मोडलया रुपय् नांजाम्ह थक्वाःजुं थ्व पालय् धाःसा अभिनयपाखे मजुसे निर्देशनपाखे थःगु पलाः न्ह्याकादीगु दु । 
लोकंह्वाम्ह अमर गायक रमेश ताम्राकार या काय् सगुन ताम्राकारं हालादीगु हिरा लानी म्येया म्युजिक भिडियो या निर्देशन कलाकःमि थक्वाःजुं यानादीगु खः ।  थ्व हिरा लानी धागु म्ये  अञ्जना ताम्राकारं च्वयादीगु खः । वयक रमेश ताम्राकार या जहान खः । थ्व म्येयात सगुन ताम्राकारं हे लय् चिनादीगु खः । बाजं ग्वसाः नं वयकलं हे ग्वयादीगु खः ।
थ्व म्युजिक भिडियो या निंतिं पूजा शाहीं समा या भाला क्वबिया दीगु खः । थुके मूभुमिकाय् अनुज शाक्य व सृष्टि महर्जन अले चिरि बाबु महर्जन,पुजन ‌श्रेष्ठ,लूनिभा महर्जन,आयशा लोप्चन पिन्सं मेमेगु भुमिकाय् म्हिता दीगु खः ।
थुकिया मू किपालुमि व छ्याय्फ्वायकःमि रक्की महर्जन , किपालुमि रिजन शाही व बिक्रम शाही खः ।
Detail page ad