येँया सम्पदा दयके भिंके खना मेयर शाक्यं लसता प्वंकल
Jheegu Sah – Bijay Ratna , २०७८ चैत्र ४, शुक्रबार वर्गीकृत समाज
येंँ महानगर पालिकापाखें येँय् महानगरं सत्या स्वयां अप्वः ल्याखय् सम्पदाया पुननिर्माण व निर्माण यानागु विषयवस्तुयात कःघाना शुक्रवाः छगू पत्रकार सम्मेलन याना जानकारी बिउगु दु ।
उगू पत्रकार सम्मेलनय् महानगरपालिकां संस्कृति व सम्पदाया ख्यलय् याना वयाच्वनागु कार्यप्रगतिबारे जानकारी महानगरया प्रमुख विद्यासुन्दर शाक्यं बियादीगु खः ।
प्रमुख शाक्यं थः महानगरय् वयेधु्ंका महानगर दुनेया कला, संस्कृति, सम्पदा संरक्षण तथा प्रवर्द्धनया झ्वलय् आपालं ज्या यानागु उकिइ सफलता नं हासिल यानागु खँ उगु पत्रकार सम्मेलनय् कनादीगु दु ।
वयकलं येँ महानगरपालिकां मरुसतः, कमलपुखुया नापनापं एेतिहासिक महत्वं जाःगु दरबार हाई स्कूल व थीथी वडाय् दयाच्वंगु ऐतिहासिक बहाः बही, मठमन्दिर, चैत्य, विहार, गुथि छेँ, द्यःछें लगायत सत्या स्वयां अप्वः सम्पदाया पुननिर्माण यानागु धका वयकलं छगू धलःपौ नं न्ह्यब्वया दिल ।
वयकलं उगु पत्रकार सम्मेलनय् स्थानीय बाजंया संरक्षण, जात्रापर्व सञ्चालन, बाजागुरुपिन्त हनावना, सांस्कृतिक ज्याखँत यानागु खँ नं कनादिल । वयकलं येँय् दुने जक मखसे स्वनिगलं पिनेया तकं ऐतिहासिक तथा पुरातात्विक महत्वया क्षेत्र लुम्बिनीया बज्रयान महाविहार, रामग्रामया पण्डितपुर क्षेत्रया विकास लगायतय् ज्या यानागु खँया नं जानकारी बियादिल । थुकथं हे वयकलं सम्पदाया ख्यलय् महानगर पालिकां आपालं ज्या याय्फूगुलिइ थः सन्तुष्ट जुयागु नं खँं कनादिल ।
