arin JS
Home page Ad

मल्ल के. सुन्दरया न्हूगु उपन्यास सेप्टेम्बर १७ पिदन

Jheegu Sah – Bijay R,    २०७८ आश्विन १, शुक्रबार    वर्गीकृत साहित्य

मानव अधिकारवादी नेता अले नेवाः न्ह्यलुवा साहित्यकार मल्ल के.सुन्दरं च्वयादीगु उपन्यास " सेप्टेम्बर १७" शुक्रबार छगू ज्याझ्वः दथुइ पितब्वज्या जुउगु दु । मूपाहाँ जनकवि दुर्गालाल श्रेष्ठं  चिखिफ्यना  उगु सफूयापितब्वज्या याना दिल ।

नेपालभाषा एकेडेमीया प्रकाशन कथं पिदंगु  थ्व सफूया पितब्वज्या ज्याझ्वः एकेडेमीया भाइस चान्सलर यज्ञरत्न धाख्वाःया सभानायसुइ जुउगु खः । ज्याझ्वलय् एकेडेमीया कार्यकारी दुजः प्राज्ञ रजनीमिला महर्जनं लसकुस न्वचु तयादीगु खः ।

साहित्यया विविध विधाय् ल्हान्ह्याम्ह साहित्यकार मल्ल के सुन्दरया थ्वसिबें न्हापा समसामयिक राजनैतिक विषयया "पोस्टर" अले नेपालसम्बतया प्रवर्तक शंखधर साख्वाःया बाखं कःघानातःगु " शंखधर" उपन्यास लगायत अापालं कृति पिदने धुंकल ।

उपन्यास " सेप्टेम्बर १७" या पितब्वज्या ज्याझ्वलय् लोकसाहित्यविद् प्रा मदनसेन बज्राचार्यं समालोचनात्मक टिप्पणी यानादिसे थ्व सफू अन्तर्राष्ट्रिय परिवेश कःघानातःगु छगू उत्कृष्ट कृति खः धका धयादिल । थ्व उपन्यास यात  अंग्रेजी भाषं भाय् हिला पिकायेमा धका धयादिल ।

मूपाहाँ जनकवि श्रेष्ठं साहित्यकार मल्लं ल्हातक्व विधाय् उति ग्यंक्क न्याये यायेफुम्ह साहित्यकार खःधका धयादिसे थ्व उपन्यास या मूपात्र थीथी देश जुया अन्तय् स्वनिगः थ्यनिसा थुकिया प्रस्तुति शैलिं थःगु नुगलय् थिल धका धयादिल ।

उपन्यासकार मल्लं जन्म व मृत्यु नितां शाश्वत सत्य खः तर जन्मन्हि सकसिनं लसतां हनि अले जन्मन्हि गबले वइ धका पिया च्वनि मृत्युया न्हि वइ धका ग्याइ धका धासे थ्वहे खँयात उपन्यास " सेप्टेम्बर १७"या बिषय दयेकागु खँ कनादिल । ज्याझ्वःया सभानायः एकेडेमीया भाइस चान्सलर धाख्वाःभाजुं साहित्यकार मल्लं नेपालभाषा एकेडेमीयात छगू बाँलागु कृति पिकायेगु भाला बियादीगुलिं सुभाय् दु धका धयादिल ।

Detail page ad