arin JS
Home page Ad

मदुम्ह वडा अध्यक्ष शशीलालयात मेयर शाक्यं श्रद्धान्जलि प्वंकल

Jheegu Sah – Bijay R,    २०७८ भाद्र १८, शुक्रबार    वर्गीकृत समाज

काठमाडौं महानगरपालिका वडा नं १९ या वडा अध्यक्ष शशी लाल श्रेष्ठया म्हिग  भाद्र १७ गते बिहिवार सनिलया ४.३० ताः इलय्  निधन जूगु दु ।

वयक  नेपाली कांग्रेस १९ वडा सभापति नं खः ।  क्यान्सर ल्वचं कया वासः याका च्वनादीम्ह वयकःयात  भाद्र १६ गते  नर्भिक अस्पतालय्   यंकूगु खः । छुं दिं न्ह्यःनिसें वयकःया उसाँय् बामलाना वःगुलिं  वयकःयात नर्भिक अस्तालय् वासः याका वयाच्वंगु खः । 

काठमाडौँ महानगरपालिकाया मेयर विद्यासुन्दर शाक्यं वडा १९ वडा अध्यक्ष शशीलाल श्रेष्ठ मत्यवं मदुबले थःम्हं अभिभावक गुमाए यानागु अनुभूति जुल धका धयादिल ।  शुक्रबार  शोक सन्देश जारी याना मेयर शाक्यं श्रेष्ठया अकल्पित निधनं थःयात तसकं दुख लगे जुउगु दु धका धयादिल । सन्देशय् मेयर शाक्यं मदुम्हेसिया आत्मा सुखावति भुवनस बासं च्वनेमा धका कामना यासे दुखंकःपि सकल परिवारजन प्रति काठमाडौं महानगरपालिकाया  सकलें जनप्रतिनिधि, कर्मचारी व महानगरवासीपाखें विचाः हायेका दिल । वयक मेयर व उपमेयर हरिप्रभा श्रेष्ठ खडगीं मदुम्ह वडा अध्यक्ष श्रेष्ठया सीम्हय् स्वां देछाना श्रद्धान्जलि प्वंकादिल । वयकःयात  श्रद्धाञ्जली अर्पण यायेया निंति  शुक्रबार सुथसिया ९ ताःइलय् निसें का.म.पा.१९ वडा ज्याकुथिया प्रांगणय् तःगु खः । व धुंकाः पशुपतिया आर्यघाटय् दाहसंस्कार याःगु खः । वयकः वंगु स्थानीय निर्वाचनय् नं वडाध्यक्षय् निर्वाचित जुयादीगु खःसा वंगु २६ क्वःगु महानगर दिवसय् वयकः सम्मानीत तकं जुयादीगु खः । वयकया जहान नापं छम्ह काय् व स्वम्ह म्ह्याय् दु ।

वयक मदुगुलिइ थीथी संघ संस्थाया लिसें थीथी उच्च व्यत्तित्वपिन्सं नं भावपूर्ण श्रद्धाञ्जली प्वंकुगु  दु । 

थुकथं भावपूर्ण श्रद्धान्जलि प्वंकेगु झ्वलय् नेकाया नेता प्रकाश मान सिंह, नेपाली कांग्रेस काठमाडौं जिल्ला कार्यसमिति परिवारया पाखें सभापति कृष्ण सबुज बानियां नेपाली कांग्रेस २४ वडा परिवारपाखें सभापति बिनोद कुमार राजभण्डारी, काठमाडौं महानगरपालिकाया ’महानगर’ बुलेटिनया सम्पादक मण्डलं वयकया दुखद निधनं काठमाडौं कांग्रेसयात तःधंगु क्षति जूगु तायकूगु दुसा वयकःप्रति हार्दिक श्रद्धाञ्जली व्यक्त  याःगु दु । थुगु दुःखया ईलय्  काठमाडौं महानगरपालिकां वडाध्यक्ष श्रेष्ठया मदुगुलिइ भाद्र १८ गते शुक्रवाःया न्हि छन्हु शोक विदा नं बिउगु  दु । 

छुं महिना न्ह्यः जक पूर्व उद्योगमन्त्री तकं जुयादी धुंकूम्ह लोकंव्हाम्ह काँग्रेस नेता नविन्द्रराज जोशी मदुगु खः । अनं लिपा हानं १९वडाया हे पुलांम्ह वडानायः एवं काग्रेसया नेता हरेन्द्र वहादुर श्रेष्ठ मदुगु खःसा आः हानं लोकप्रिय वडाध्यक्ष श्रेष्ठ मदुगु अवस्था सिर्जना जूगु दु । थुगु दुःखया इलय् काठमाडौं काँग्रेस क्षेत्र नं ८ क्षेत्रीय सचिव राजेश श्रेष्ठं दुःख प्वंकादीगु दु । 

 

 

Detail page ad