arin JS
Home page Ad

भिन्छेबहालं खुया यंकुगु बोधिसत्वया मुर्ति लित हल

Jheegu Sah – Bijay Ratna ,    २०७८ चैत्र २७, आइतबार    वर्गीकृत तजिलजि

यलया मयुरबर्ण महाबिहार भिन्छेबहालं  वि सं २०३८ सालय् बोधिसत्वया मुर्ति खुया यंकुगु खः ।

अथे खुया यंकुगु मुर्ति अमेरिकां  वि सं २०५६ य लित हया छाउनिस्थित राष्ट्रिय सङ्ग्रहालय तयातःगु खः ।

वहे मुर्ति पुरातत्व बिभाग लिसे प्रकृया पुवंका  राष्ट्रिय सङ्ग्राहालयपाखें सुरक्षित रुपं भिन्छेबहालय् हे लित हःगु दु ।  सङ्ग्राहलय प्रमुख जयराम श्रेष्ठं कयादी कथं ताहाकगु इलं निसें मयुरबर्ण महाबिहारया सम्बन्धित पक्षं खोजिनिति यागु खःसां लुइके मफयाच्वंगु ख: । तर राष्ट्रिय संग्राहालयस दुउगु सिइका पुनर्स्थापनाया नितिं निबेदन तगु ख: ।

सहकालया द्यः बुंगद्यःयात नेपाः हयेत न्ह्यःचिलादीम्ह बन्धुदत्त आचार्यया म्ह्यायया सन्ततितयसं स्थापना याःगु    ८/९ औं शताब्दिया उगु बोधिसत्वया मुर्ति खः धका मयुरबर्ण महाबिहार सुधार समितिया अध्यक्ष सुरेन्द्र बज्राचार्यं कनां दिल ।

बोधिसत्वया उगु मुर्ति खुया यंके धुंका वहे थासय् प्रतिरुप कथं मेगु मुर्ति स्थापना याय् धुंकुगु खः । यल महानगरपालिकाया उपमेयर गिता सत्याल , यल महानगरपालिका वडा  ७ या वडाअध्यक्ष कुलबहादुर महर्जन लगायत जनप्रतिनिधिपिं व मयुर बर्ण महाबिहारया स्थानिय बासिन्दातयगु उपस्थितिइ शनिवार छगु ज्याझ्वलय्  राष्ट्रिय सङ्ग्रहालयया प्रमुख जयराम श्रेष्ठं उगु मुर्ति लःल्हायेगु ज्या जुगु ख: ।

सङ्र्ग्रहालय अधिकृत सुभाष कृष्ण डंगोलं कनां दिइकथं  थ्व सिबें न्ह्यव: बज्रबाराहिं तंगु मुर्ति व नक्सालया पद्मपाणि मुर्ति नं सम्बन्धित पक्षयात हस्तान्तरण यायधुंकुगु दुसाः  नापनापं  लुइका बिदेशं लितःहगु दर्जनौं मुर्ति , त्वनासिं लगायत सम्पदात संग्ग्राहालयस दुउगुलिं  सम्बन्धित पक्षं च्युता प्वंका थःथःगु थासय् लित हयेमा धका नं सः थ्वया च्वंगु दु ।

Detail page ad