arin JS
Home page Ad

बौद्ध वक्तृत्वकला धेंधें बल्ला कासाय् संस्कृतिमन्त्री जीवनराम श्रेष्ठपाखें पत्रकार सुनिल महर्जन सम्मानित

Jheegu Sah – Bijay Ratna ,    २०७९ श्रावण २३, सोमबार    वर्गीकृत पुलुपालु

          बौद्ध युवा कमिटी यलया ग्वसालय् जुगु नीच्याक्वःगु स्वनिगः व्यापी बौद्ध वक्तृत्वकला धेंधें बल्लाखय् मैत्रीय युवा संघ ख्वपया प्रमिला धुख्वाः न्हाप लाःगु दु।
थ्व ज्याझ्वःया सिरपा इनेज्याझ्वलय् मूपाहाँ  संस्कृति, पर्यटन तथा नागरिक उडड्यन मन्त्री जीवनराम श्रेष्ठं थुकथंया रचनात्मक ज्याखं किशोर, किशोरी व ल्याय्म्हतय्त बुद्धया ज्ञान थुइके फइगुलिसें व्यक्तित्व विकास जुइगु बिचाः न्ह्यब्वयादिल। लुम्बिनी विकास कोषया नायः तकं खःम्ह मन्त्री श्रेष्ठं लु्म्बिनीया गुरुयोजना कथं विश्वया शान्ति व पर्यटन केन्द्र दय्केत थम्हं कुतः यानाच्वनागु जानकारी बियादिल। ज्याझ्वलय् ल्याय्म्ह वर्गयात लक्षित यानाः बुद्ध धर्मया विकासय् महत्वपूर्ण योगदान बिउगु ज्यायात कदर यासे कमिटीया संस्थापक राजु शाक्य व पूर्वअध्यक्ष सुनील महर्जनयात सम्मान याःगु खः। पूर्वअध्यक्ष महर्जन नांजाम्ह पत्रकारया नापनापं नेवाः पत्रकार राष्ट्रिय दबूया मूछ्यान्जे नं खः ।
 
सम्मानित निम्हेसितं कमिटीया नायः सतिश शाक्यं स्वांमाः व भिक्षु कौण्डन्यं दोसल्ला न्यय्कादिलसा मन्त्री श्रेष्ठं हनापौ लःल्हानादिल।  मैत्रीय युवा संघ ख्वपया प्रमिला धुख्वाः न्हाप लाःगु स्वनिगः व्यापी बौद्ध वक्तृत्वकला धेंधें बल्लाखय् शाक्यसिंह बौद्ध परियति शिक्षालयया अनिशा श्रेष्ठ लि, धर्म साकच्छा संघ हःखाया प्रतिष्ठा शाक्य लियांलिउ लाःगु खः । दिपावती पुस्तकालयया पारमी शाक्य व निर्वाणमूर्ति विहारया सजगता मानन्धर निम्हेसिनं हःपाः सिरपाः त्याकादीगु धेंधें बल्लाखय् झिगु संघसंस्थाया ब्वति दुगु खः। सिरपाय् न्हाप लाःम्हेसित झिंन्याद्वःतका या नापनापं निम्हेसिगु नितिं पोखराया एकतर्फी हवाजजहाज टिकट नं दोहलपा कथं लःल्हागु खः। धेंधें बल्लाखय् लिउ सिरपा झिद्वःतका, लियांल्यू लाःम्हेसित च्याद्व तकालिसें सिन्धुपाल्चोकया भोटेकोशीइ बञ्जी जम्पया कुपन तकं दोहलपा कथं देछागु खः ।
 
अथेहेतुं ब्वतिकापिं सकसित द्वःछि द्वःछि तका नं देछागु खः। समाजसेवी मोतिलाल शिल्पकारं उगु दाँ सकलसित  सिरपा कथं लःल्हानादिल सा बागमति प्रदेशया सांसद् शोभा शाक्यं दसिपौ लःल्हानादिल। धेंधें बल्लाःया निर्णायक मण्डलय् भिक्षु विमलो, शाक्य सुरेन, मदनरत्न मानन्धर व नरेशवीर शाक्य दुगु खः।
 
वि सं २०५० सालनिसें दँय्दसं असार पुन्हिया दिनय् जुयावःगु थ्व ज्याझ्वः कोरोना संक्रमणया हुनिं २०७७ व २०७८ सालय् धाःसा जुइमफुगु खः। थ्व ज्याझ्वलय् भिक्षु कौण्डन्य, सम्मानितपाखें कमिटिया पूर्वअध्यक्ष महर्जनं लगायतं बुद्ध धर्मयात  क्षमता विकासया कोणं स्वयेमाःगु धासें ल्यायम्ह वर्गया रुचि, चाहना व आवश्यकतायात सम्बोधन यानावनेमाःगुलिइ बः बियादिल। ज्याझ्वलय् बौद्ध वक्तृत्वकला पर्व मूगुथिया नायः विश्वन्तर शाक्ययात कार्यकालया सफलताया कामना यासें भिंतुना व बधाई पत्र नं लःल्हाःगु खः।
Detail page ad