arin JS
Home page Ad

बुदिंया भिन्तुना म्येया नेपाली संस्करण पिदन

Jheegu Sah – Bijay Ratna ,    २०७९ बैशाख १८, आइतबार    वर्गीकृत मनोरञ्जन

 
नांजाम्ह रेडियोकर्मी , म्येच्वमि व म्येहालामि कथं लोकंह्वाम्ह सुरजबीर बज्राचार्यं च्वयादीगु बुदिंया भिन्तुना म्येया नेपाली संस्करणया  आइतबार पितब्वज्या जुउगु दु ।
 
म्येच्वमि व म्येहालामि  बज्राचार्यया नेपालभाषाय् अतिकं लोकंह्वागु बुदिंया भिन्तुना म्येया नेपाली संस्करणया पितब्वज्या भृकुटीमण्डपया बुद्धविहारय् ख्यालिजुजु कथं नांजाम्ह वरिष्ठ कलाकार मदनकृष्ण श्रेष्ठया मूपाहाँसुइ जुउगु  ज्याझ्वलय् वरिष्ठ कलाकार श्रेष्ठं नेपालभाषाया लोकंह्वागु म्येया थपू यायेत मेमेगु भाषाय् भाय् हिला यंकेगु कुतः या तारीफ यानादिल ।
 
भिक्षु कोण्डन्य महास्थविरया सभानायसुइ जुउगु उगु कार्यक्रमय् वयकलं मैत्रीभावं जाःगु म्येया लोकार्पण लोकार्पण कार्यक्रम थःम्हेसिनं ग्वसाः ग्वये खना खुशी लगे जुल धका धयादिल ।  वयकलं थ्व म्येचा मेमेगु भाषाया संस्करणया समेत निर्माणय् थः व थुगु बुद्धविहारपाखें सदां ग्वाहालि जुइ धका नं धयादिल ।
 
ज्याझ्वलय् धर्मोदय सभाया मूछ्यान्जे सागरमान बज्राचार्य व पेजथ्री पाक्षिकया सम्पादक दर्शनवीर शाक्यं म्येया बारे थःथःगु नुगःखँ तयादिल । म्येच्वमि व म्येहालामि  बज्राचार्यं लसकुस न्वचु तयेगु झ्वलय्  नेपालभाषाय् अतिकं लोकंह्वानाच्वंगु “बुदिंया भिंतुना म्ये  प्रति समाजं बिउगु साथ ,हःपाः व तिबः दया हे थुकथं मेमेगु भाषं नं थ्व म्ये पिकायेगु पलाः न्ह्याकागु खँ कनादिल ।
 
म्ये पितब्वज्या ज्याझ्वलय् संगीत संयोजक जुगल डंगोल, चेज होम एप्लायन्सेजया सुरेश मल्ल,  म्येया सर्जक बज्राचार्यया अबु नामसंगिती गुरु  हिरण्यवर्ण महाविहारया आजु चित्रवीर बज्राचार्य, युवक बौद्ध समूह, काठमाडौंया अध्यक्ष मदनबहादुर तुलाधर, बौद्ध महिला संघया उपाध्यक्ष बीना कंसाकार पाहाँ कथं विशेष उपस्थिति दुगु खः ।  ज्याझ्वलय् विहारया दुजः सानुबाबु सायमिं सुभाय् देछाना दीगु खः ।
Detail page ad