arin JS
Home page Ad

न्हूदँया सकतां ज्याझ्वः पितबिल

Jheegu Sah – Rajeev Rajopadhyaya,    २०७८ कार्तिक १५, सोमबार    वर्गीकृत राष्ट्रिय

 

नेपाल सम्बत न्हूदँ राष्ट्रिय समारोह समितिपाखें थुगुसिइ न्हूदँ या लसताय् जुइगु सकतां ज्याझ्वः पितबिउगु दु ।

नेपाल सम्बत न्हूदँ राष्ट्रिय समारोह समिति ११४२ या ग्वसालय्  सोमवाः सुथय् पत्रकार सम्मेलन यासें न्हूदँया सकतां ज्याझ्वः सार्वजनिक याःगु खःसा समारोह समितिया निरञ्जनरत्न शाक्यं न्हूदँ ११४२ या लसताय् येँया बसन्तपुलिइ जुइगु भिंतुना र्यालि व र्याली लिपा जुइगु सभाय् ब्वति कायेत सकलसित इनाप यानादीगु दु ।

समितिया नायः शाक्यं पत्रकार सम्मेलनय् प्रेस विज्ञप्ति ब्वनाः न्यंकादिसें न्हूदँया लसताय् थीथी ज्याझ्वः यायेगु जानकारी बियादीगु दु ।

उगु विज्ञप्तिइ थुगुसिनिसें शंखधर दिवस येँया लखुतीर्थया लिसेलिसें शंखधर पार्कय् नं यायेगु खँ न्ह्यथनादीगु दुसा अथेहे, नेपाल सम्बतया नितिं आर्थिक कोषया व्यवस्था यायेगु व नेपाल संवतयात कयाः प्रशिक्षण ज्याझ्वः न्ह्याकेगु खँ नं न्ह्यथनादीगु दु ।

समितिपाखें पित बिउगु ज्याझ्वः कथं दँय्दसं थें नेपाल संवत न्हूदँया लसताय् भिन्तुना सभा व भिन्तुना र्याली ग्वसाः ग्वयाः वयाच्वंगुलिइ थगुने कोरोना महामारीया हुनिं राज्य याःगु लकडाउनया कारणं भर्चुअल माध्यमं भिन्तुना सभा लिसें बिचा गोष्ठी व साँस्कृतिक ज्याझ्वः ग्वसाः ग्वयागु खः ।

थुगुसिइ कोरोना महामारीया सक्रमण छुं भचा क्वलानाः वंगुलिं  स्वास्थ्य सुरक्षाया मापदण्ड पूर्णरुपं पालना यानाः नेपाल संवतया न्हूदँ तःजिक हनेगु निंतिं नेपाल संवत न्हूदँ राष्ट्रिय समारोह समिति ११४२ निरञ्जनरत्न शाक्यया नेतृत्वय् नीस्वनेज्या लिसें न्हूदँ तःजिक हनेगु निंतिं च्येम्ह दुजः दुगु समारोह समिति गठन यानाः १५ सदस्यीय सचिवालय समिति नीस्वनेगु ज्या जूगु खँ जानकारी बिउगु दु ।

समारोह समितिया संचार उपसमितिया ग्वसालय् जूगु उगु पत्रकार सम्मेलन ज्याझ्वः नृपेन्द्रलाल श्रेष्ठं न्ह्याकादीगु खःसा सुभाय् सुजीव बज्राचार्यं देछानादीगु खः ।

 

Detail page ad