arin JS
Home page Ad

नेवाः हाइकु नखः तजिक क्वचाल

Jheegu Sah – Bijay Ratna ,    २०७९ श्रावण २१, शनिबार    वर्गीकृत साहित्य

        नेपालभाषाया साहित्यख्यलय् हाइकु छगू लोकंह्वागु विधा जुया न्ह्यावना च्वंगु दु । थ्वहे झ्वलय्  हाइकु साहित्ययात च्वन्ह्याकेगु न्ह्याकेगु आज्जु ज्वना निस्वनातःगु नेवाः हाइकु ख्यः नांयागु पुचलं शनिवार छगू हाइकु सम्मेलनया ग्वसाः ग्वगु दु ।
 
नेवाः हाइकु नखः या नामं जूगु उगु हाइकु सम्मेलनय् निगु दर्जनसिबें अप्वः हाइकुच्वमिपिन्सं थःथःगु हाइकु ब्वना न्यंकादीगु खः । नेवाः हाइकु ख्यःया कजि सुरेश प्रधानया सभानायसुइ न्ह्यागु उगु ज्याझ्वः यलया सातोआकि भवनय् जुउगु खः । ज्याझ्वः मूपाहाँ नेपालभाषा एकेडेमीया चान्सलर यज्ञरत्न धाख्वाःजुं त्वादेवाय् मतच्याका उलेज्या यानादीगु खः ।
 
ज्याझ्वलय् लसकुस न्वचु तयेगु झ्वलय् ग्वसाखलःया कजि सुरेश प्रधानं हाइकु साहित्य ख्यः न्हियान्हिथं तब्या जुया वया च्वंगुलिं लसता प्वंकादिल । ज्याझ्वलय् तसकं नांजाम्ह साहित्यकार भुषणप्रसाद श्रेष्ठ या नापनापं समान्त श्रेष्ठ,रिता महर्जन, राजेश्वरी राजोपाध्याय,प्रदिप तुलाधर,अनुप श्रेष्ठाचार्य, विमला शर्मा, ज्ञानेन्द्ररत्न बज्राचार्य,सुरेन्द्र लाल भुजु, मंगला तुलाधर,बुद्ध रत्न जः,उर्मिला डंगोल,दिव्या ताम्राकार,मन्जुश्री श्रेष्ठ,ज्ञानीदेवी शाक्य, सुमन महर्जन लगायतया हाइजिन पिन्सं हाइकु ब्वना न्यंकादीगु खः ।
 
अन वाचन जुउगु हाइकु लगायत हाइकु साहित्य बारेया थीथी पक्षयात कया समालोचक नेपालभाषा एकेडेमीया सदस्य सचिब डा पुष्पराज राजकर्णिकार, समिक्षक द्वय ध्रुव मधिकःमि व पुर्णकाजि ताम्राकार पिन्सं न्ववाना दीगु ज्याझ्वलय् नेपाःया नांजाम्ह हाइजिन पुष्कर लोहनी,समालोचक स्व इन्द्र मालिया म्ह्याय् अनिता मालि श्रेष्ठ , भायलचंमि पौभा सायमिया विशेष उपस्थिति दुउगु खः ।
Detail page ad