arin JS
Home page Ad

नेपाल सम्बत् आन्दोलनया न्ह्यलुवाः मानन्धरयात मन्त्री श्रेष्ठपाखें सम्मान

Jheegu Sah – Bijay Ratna ,    २०७९ भाद्र २६, आइतबार    वर्गीकृत पुलुपालु

      नेपाल सम्बत् आन्दोलनया न्ह्यलुवाः देवदास मानन्धरयात थौं शनिवाः छगू ज्याझ्वःया दथुइ संस्कृति, पर्यटन तथा नागरिक उड्डयन मन्त्री जीवनराम श्रेष्ठं सम्मान यासें हनापौ लःल्हानादीगु दु ।
 
भाजु मानन्धर वासः यानाच्वंगु महाराजगञ्जया नमन केयर सेन्टरय् वनाः नेपाल सम्बत् न्हूदँ राष्ट्रिय समारोह समितिया ग्वसालय् थथे सम्मान याःगु खः । समारोह समितिया नायः निरञ्जनरत्न शाक्यं मानन्धरं नेपाल सम्बत् आन्दोलनयात तिबः बीकथं यक्व ज्या यानादीधुंकूम्ह व्यक्तित्व जूगुलिं मानन्धरया योगदानयात लुमंकाः थथे केयर सेन्टरय् हे वयाः सम्मान यानागु खँ कनादिल । अथे हे, मन्त्री श्रेष्ठं मानन्धरयात खादा न्ययेकाः वय्कःया सुस्वास्थ्यया कामना यासें हनापौ लःल्हानादीगु खः ।
 
वय्कःयात देछाःगु हनापतिइ ‘नेपाल सम्बत् न्हूदँ राष्ट्रिय समारोह समितिइ छिस्कर देवदास मानन्धरजुपाखें नेपाल सम्बत् आन्दोलनयात पाय्छि कथं न्ह्याकेगु निंतिं निरन्तर रूपं यानावयाच्वंगु योगदानयात जिमिसं लुमंकाच्वना’ धकाः न्ह्यथनातःगु दु ।
 
अथे हे, उगु हनापतिइ ‘समारोह समितिइ थ्यंमथ्यं छगू दशक न्ह्यवनिसें नेपाल सम्बत् व्यवहारय् छ्यलेज्यू व छ्यलेफु धकाः विशेष यानाः नेवाः समाजय् मौलिक तिथिमिति लिसें चन्द्रमास कथं गुकथं तिथि हिली थ्व खँयात यच्चुक ध्वाथुइकेत छिस्करं समितिया तिथिपौ समितिया कजि व समारोह समितिया दुजः जुयाः दँय्दसं समारोह समितिया तिथिपौ पिकयाच्वंगु खँयात च्वछायाच्वना’ धकाः न्ह्यथनातःगु दु । थथे हनापौ लःल्हायेगु ज्याझ्वलय् समारोह समितिया सल्लाहकार लिसें पूर्व स्वास्थ्य राज्यमन्त्री तीर्थराम डंगोलं मानन्धरया व्यक्तित्व व योगदानयात कयाः न्ववानादिसें भिंउसाँय्या कामना यानादीगु खः ।
Detail page ad