arin JS
Home page Ad

नेपालसम्बत यात लेटरप्याडय् व मन्त्रिपरिषदया माइनेटय् छ्यलेत प्रम देउवाया आदेश

Jheegu Sah – Bijay Ratna ,    २०७८ कार्तिक ८, सोमबार    वर्गीकृत राष्ट्रिय

 

 

प्रधानमन्त्री शेरबहादुर देउवां नेपाःया मौलिक राष्ट्रिय सम्बत नेपाल सम्बतयात प्रधानमन्त्रीया लेटरप्याडय् छ्यलेगु व मन्त्रिपरिषदया मुँज्यां याइगु थीथी निर्णयया निर्णय पुस्तिकाय् नेपाल संवतयात नं छ्यलेगु खँ तःधंगु मजूगु बिचाः प्वंकादीगु दु ।

वय्कलं उगु विचाः  सोमवार नेपाल सम्बत राष्ट्रिय न्हूदँ समारोह समिति ११४२ या नायः निरञ्जनरत्न शाक्यया नेतृत्वय् न्हूदँ समारोह समितिया दुजःपिं दुथ्याःगु प्रतिनिधि मण्डललिसे प्रधानमन्त्री निवास बालुवाटारय् नापलासें प्वंकादीगु खः ।

प्रधानमन्त्री देउवां थथे थःगु विचाः प्वंकेगु लिसें थः स्वकीय सचिवयात तत्काल थ्वबारे विचाः यानाः ज्या न्ह्याकेत उजं बियादीगु खः ।

नेवाः न्ह्यलुवाःलिसें नेपाल सम्बत आन्दोलनया अग्रज मल्ल के. सुन्दरं प्रधानमन्त्री देउवायात नेपाल संवत् ११४२ न्हूदँया लसताय् व वय्कःया कार्यकालय् म्होति नं प्रधानमन्त्रीया लेटरप्याडय् नेपाल सम्बत छ्यलेत, मन्त्रिपरिषदया निर्णय पुस्तिकाय् नेपाल सम्बत नं च्वयेत व नेपाःया नोटय् नेपाल सम्बत तयेत इनाप यानादीगु खः ।

थथे नेवाः न्ह्यलुवाः सुन्दरं यानादीगु इनापयात कयाः तत्काल हे प्रधानमन्त्रीं निगू ज्या यायेगु कथं सकारात्मक विचाः प्वंकादीगु खः ।समारोह समितिया नायः निरञ्जनरत्न शाक्यं न्हूदँया लसताय् थ्वहे वइगु कछलाथ्व पारु (कार्तिक १९ गते) शुक्रवाः येँया बसन्तपुलिइ जुइगु भिन्तुना सभाय् मूपाहाँ कथं ब्वति कायेत इनाप यानादीगु खःसा प्रम देउवां थःपिं उगु सभाय् वयेगु बचं बियादीगु खः ।

अथेहे, समारोह समितिंं लःल्हाःगु नेपाल संवतयात कयाः ध्यानाकर्षण पौयात नं प्रम देउवां सकारात्मक रुपं कयादीगु खः ।नायः शाक्यया नेतृत्वय् समारोह समितिया सल्लाहकार, पूर्वमन्त्री, सांसद भिमसेनदास प्रधानं नं प्रम देउवायात नेपाल संवतया महत्व व जनस्तरं थ्व संवतयात कयाः यानाच्वंगु अभियानयात कयाः जानकारी बियादीगु खः ।

समारोह समितिया दुजः नविन मानन्धरं न्हूदँ ११४२ या पाखें औपचारिक रुपं प्रधानमन्त्रीयात ध्यानाकर्षण पौ ब्वनाः न्यंकादीगु खः ।

Detail page ad