arin JS
Home page Ad

निर्दशक सुरेन्द्र तुलाधरं दयेकिगु जुल नेपालभाषाया न्हापांगु बायोपिक फिल्म

Jheegu Sah – meena bajracharya,    २०७९ आश्विन ४, मंगलबार    वर्गीकृत मनोरञ्जन

निर्दशक सुरेन्द्र तुलाधरया  ‘इन्दिरा घिमे मैँचा’ फिल्मया शुभ मुहुर्त जुल
 
नेपालभाषाया फिल्मख्यःया नांजाम्ह निर्देशक सुरेन्द्र तुलाधरया छगू न्हूगु नेवाः फिल्म ‘इन्दिरा घिमे मैँचा’ या ख्वपःया कमलविनायक बेंक्वेट य्  शुभ मुहूर्त याःगु दु । थ्व फिल्म नेपाःया दकले न्हापांम्ह धिमे वादक मिसा  इन्दिरा लाछिमस्यूया जीवनीइ आधारित ‘इन्दिरा घिमे मैँचा’ नेपालभाषाया दकले न्हापांगु बायोपिक फिल्म खः ।
 
 बिके फिल्मस् पाखें  निर्माण जुइगु थ्व फिल्मया च्वमि व निर्देशक सुरेन्द्र तुलाधर खः । गोपाल काजी कायस्थं न्ह्यब्वःयादीगु थ्व फिल्मया निर्माता सुरेन्द्र शाक्य खःसा सह-निर्माताय् प्रकाश दिप श्रेष्ठ, गंगादेवी मानन्धर, सरिना बज्राचार्य, रजना जोशी व प्रबिन भाम पिनिगु नं सहभागीता दइ । थ्वहे वइगु मोहनीया नलास्वनेगु दिं असोज १० गते निसें फिल्मया शुटिङ्ग ख्वपय् न्ह्याइगु खँ निर्माण टीम जानकारी बिउगु दु ।
 
शुभ मुहुर्त ज्याझ्वलय् ख्वपः नगरपालिकाया मेयर सुनिल प्रजापतिं इन्दिरा लाछिमस्यु ख्वपःया जक गौरव मखसे देशया हे गौरव खः धका धासे थ्व गौरवशालि इतिहास म्वाका तये निंतिं थःम्हं फक्व ग्वाहालि यायेगु बचं बिया दिल । ज्याझ्वलय् विशेष पाहाँ चलचित्र संघया निवर्तमान नायः मधुसुदन प्रधान, सिने पत्रकार विजयरत्न असंबरे , इतिहासविद् डा पुरुषोत्तम लोचन श्रेष्ठ  व लक्ष्मीप्रसाद धुकुछु लगायतं फिल्मया बारे थःथःगु खँ तयादिल ।
 
थ्व फिल्मया मू भुमिकाय्  रोजिना सुवालया नापनापं गणेश राम लाक्षी, आशा काजि थकु, नगिना जोशी, , रुपेन श्रेष्ठ, देब चन्द्र बज्राचार्य, राम राजा भाम व सिम्रिक श्रेष्ठ पिनिगु मू भूमिका दइगु जुउगु दु । फिल्मया संगीतकार निल शाक्य व सुरेन्द्र श्रेष्ठ खः । थुके जिवित जल्मी, भुपेन्द्र बज्राचार्य व फिरोज बज्राचार्य पिन्सं वाद्य संयोजन यानादिइ । फिल्मय् गायक जुजुकाजि रंजित व बानिका प्रधानं म्येहालादीगु दु  । सोहन मानन्धरं छायांकन यानादी त्यंगु थ्व फिल्मया मुख्य सहायक निर्देशज भोगेन्द्र मानन्धर व  ब्यबस्थापन सिताराम माकः भाजुं यानादी ।
Detail page ad