arin JS
Home page Ad

ड्रग्स काण्डय् लाम्ह काय् नापलायेत शाहरुख खान जेलय्

Jheegu Sah – Bijay R,    २०७८ कार्तिक ५, शुक्रबार    वर्गीकृत मनोरञ्जन

भारतय् बलिउड धका धयातगु हिन्दि फिल्मख्यया नांजाम्ह हिरो शाहरुख खानया काय् आर्यन खान ड्रग्स काण्डय् लाना थौंकन्हे जेलय् लाना च्वंगु दुसाः तन्हु न्ह्यःनिसें जेलय् लाना च्वंम्ह काय् यात नापलायेत फिल्म स्टार खान १७ न्हु लिपा तिनि जेल वंगु खः ।

शाहरुख खानया काय् आर्यनयात वंगु अक्टोबर या २ तारीख खुन्हु ड्रग्स काण्डय् ज्वंगु खःसा उखुन्हु निसें जेलय् तयातःगु खः । क्रुज पार्टी कथं विशाल जहाजय् जुइत्यंगु उगु भोजय् मुम्बईया झिन्च्यासःति मनु सतातःगु खःसा उकिइ मध्ये शाहरुख खानया काय् नं दुथ्या । नीस्वदँ दुम्ह आर्यनयात अन वया मेपिं पासापिं नापं ज्वंगु खः ।

उगु भोजय् ड्रग्स या छ्यलाबुला जुइगु सुचं या लिधंसाय् भारतया एनसिबि यानिकी नार्कोटिक्स कन्ट्रोल ब्युरोया अफिसरपिन्सं अन छापामारे याःगु खःसा उकि मध्ये आर्यन खान नापं वया पासापिं अरबाज मर्चेण्ट व मुनमुन मखेजा नापं  च्याम्हेसित ज्वना यंकुगु खः ।

अन छापा मारे याबले आर्यनपाखें छुं बरामद जुउगु मदुसा वया पासा अरबाज पाखें ड्रग्स बरामद जुउगु खः । आर्यनया वकिलं थ्वहे आधारे थः क्लाइन्ट दोषी मखु सः तःगु दु तर अदालतं आर्यनयात  जमानतय् मत्वतेगु निर्णय यागु दु । आः २६ अक्टोबर खुन्हु जुइगु सुनुवाइले जमानतया बारे निर्णय जुइगु खँ दु । उखुन्हु नं अदालतं जमानतया आदेश निर्णय याये मफुत धाःसा आर्यन खानयात अझ अप्वः जेल च्वने मालिगु खनेदु ।

छाय् महाराष्ट्र य् छुं दिन लिपा दिवालि पर्व या निंतिं तन्हु बिदा जुइ । विदा बले अदालतं बन्द जुइ ।

बलिउड या स्टार सन दथुइ अप्वया वयाच्वंगु ड्रग्स काण्डय्  संजय दत्त काण्ड थ्व दकले चर्चित व विवादास्पद कथं कयातःगु दु । थ्व काण्ड य् मेम्ह बलिउड स्टार चंकि पाण्डे या म्ह्याय् अनन्या पाण्डें या नां नं स्वाना वया च्वंगु दुसाः वंलिसे नं एनसिबि यानिकी नार्कोटिक्स कन्ट्रोल ब्युरोया अफिसरपिन्सं न्यनेकने यायेधुंकुगु दु ।

अनन्या धइम्ह आर्यनया तसकं मिले जुम्ह खःसा एनसिबि सुत्रं आर्यन व अनन्या दथुइ ड्रग्स सेवनया बारे अापालं खँ जुउगु प्रमाण दु धका धया च्वंगु दु । आपालं ड्रग्स काण्ड जुया च्वनिगु बलिउडय् थगुने तिनि शुसान्त सिंह नांयाम्ह कलाकारया आत्महत्या लिसे नं ड्रग्स काण्डया ल्हा दुगु खँ पिहाँ वःगु खः ।

-- थीथी न्युज एजेन्सिपाखें

Detail page ad