arin JS
Home page Ad

"झीगु सः” टिभि ज्याझ्वः १२५ ब्व पूवन

Jheegu Sah – meena bajracharya,    २०७९ आश्विन १५, शनिबार    वर्गीकृत मनोरञ्जन

       नाइस टेलिभिजनय् प्रसारण जुया वया च्वंगु नेपालभाषाया छगुयां छगू ज्याझ्वः "झीगु सः” १२५ ब्व पूवंगु दु । थ्वहे लसता हनेकथं शनिवार छगू ज्याझ्वः याना मोहनी स्वन्ति नखः व न्हूदँ नेपाल सम्बत ११४३ या लसताय् भिन्तुना कालबिलया नापनापं  "झीगु सः” थनतक थ्यंकेत ग्वाहालि याःपिन्त सुभाए देछागु दु ।
झीगु सः  ज्याझ्वःया सल्लाहकार संघ रत्न शाक्यया सभानायसुइ जुउगु उगु ज्या झीगु सः व सुकुण्दा प्रोडक्शनया मंका कुतलय् ग्वसाः ग्वगु ख्यालः नखः ११४२ ज्याझ्वलय् ब्वति कागु पुचःयात नं सुभाए देछासे हंगु खः ।
 
वहे ज्याझ्वलय् रेडियो नेशन १०३.९ मेगाहर्जय् सन्चालन जुया च्वंगु नेवाः ज्याझ्वः" रेडियो झीगु सः” या ज्याझ्वः न्ह्याकामिया नापनापं  विज्ञापनदातापिन्त नं सुभाए कथं मतिना या चिं देछागु खः । झीगु सः पुचः दुनेलाःगु रेडियो झीगु सः या कजि राजु राजदेव बज्राचार्यं लसकुस यानादिल ।
 
ज्याझ्वलय् झीगु सः पुचःया संरक्षक विजयरत्न असंबरें झीगु सः पाखें टिभि ज्याझ्वः , रेडियो ज्याझ्वःया नापनापं अनलाइनन्युज पोर्टल नं न्ह्याका च्वनागु खँ कनादिल । थथे स्वंगुलिं सन्चार माध्यमय् झीगु सः या उपस्थिति दुगुयात लुधंके थाय् दुसां अझ नं नेपालभाषाया सन्चारख्यःयात बल्लागु लजगाया रुपय् काय् मफुनि धका धयादिल ।
 
ललितपुर वडा नं १६ या वडा अध्यक्ष निर्मलरत्न शाक्यं नेपालभाषाया टिभि ज्याझ्वः यात थाय् बिउगुलिं नाइस टेलिभिजन यात सुभाए धका धासे थ्व ज्याझ्वः यात तालाका यंकेत थःम्हं फूचाःगु ग्वाहालि यानातुं च्वनेगु बचं बियादिल ।
 
ज्याझ्वलय् सुकुण्दा फिल्म प्रोडक्शन या बाश शाही, नाइस टेलिभिजन या प्रमुख निर्माता समीर जोशी व ज्याझ्वःया सभानायः संघरत्न शाक्य लगाएतं नुगःखँ तयादिल ।  झीगु सः टिभि ज्याझ्वःया इपिसोड निर्देशक राजिव राजोपाध्यायं ज्याझ्वलय् सुभाए न्वचु तया दीगु खः ।
Detail page ad