ख्यालिजुजु मदनकृष्ण श्रेष्ठया ज्वरा ज्वरा पर्सि बियां म्ये पिहावइगु
Jheegu Sah – Bijay Ratna , २०७८ फाल्गुण ३, मंगलबार वर्गीकृत मनोरञ्जन
ख्यालिजुजु मदनकृष्ण श्रेष्ठया न्हापा हे आः नकतिनि तसकं लोकंह्वागु छपु म्ये रेकर्डिंग जुउगु दु ।
रेकर्डिंग मजूया च्वंगु नेपालभाषाया छपू थ्व लोकंह्वाःगु म्ये ज्वरा ज्वरा पर्सि बिया छं छाय् मसिना.. बोलया म्ये छुं ई न्ह्यः तिनि हरिशरण साय्मिया स्ट्रिंग्स रेकर्डिंग स्टुडियो, अनामनगरय् जुल ।
निम्ह कलाः ब्याहा यानातःम्ह मिजंया समस्यायात हास्य रसय् दुंबिंका च्वयातःगु थुगु म्येया बारे ख्यालिजुजु मदनकृष्ण श्रेष्ठ जुं धयादी कथं वयक सन १९९०स् फलोरिडाय् झायादीगु इलय् गंगा बहादुर मालाकारयात नापलानागु व वय्कलं थ्व म्ये ज्वरा ज्वरा पर्सि सिनां छकू हालान्यंका दिउगु जुया च्वन ।
ख्यालिजुजु श्रेष्ठया धापू कथं थ्व हे छकू म्ये पुरा याना न्हूगु हे खँग्वः तनां छगू बिस्कं हे न्हूगु म्ये दयेकुगुलिं थुगु म्येया च्वमि गंगा मालाकार व मदनकृष्ण श्रेष्ठ खः धइगु खनेदु ।
थुगु म्ये न्हापा नं ख्यालि जुजु मदनकृष्ण श्रेष्ठं याकःचा हे हालाच्वंगु खःसा आ न्हूगु एरेन्ज कथं रोजी डंगोल श्रेष्ठ व सरीता शाही नं थुकी सः बियाच्वंगु दु । म्येया संगीत संयोजक जीवित जल्मिं थुगु म्ये पारम्परिक नेवाः म्ये शैली दु धाःसें अझ नं ख्यालि जुजु मदनकृष्ण श्रेष्ठलिसे न्यागू प्रोजेक्ट ल्यंदनि धकाः कनादिगु दु ।
स्वम्ह जाना हालादीगु थ्व म्येया म्युजिक भिडयो नं दयेकेगु ग्वसाः जुया च्वंगु दुसाः उकिया निंतिं नांजाम्ह निर्देशक रामकृष्ण खडगीयात भालाबिइ धुंकुगु दुसाः आः याकनं हे म्युजिक भिडयोया शुटिङ्ग जुइगु खँ दु ।
