क्याम्पसय् नेपालभाषा ब्वनामि अप्वयेकेत चिहा-च्वखँ धेंधेंबल्ला कासा जुइगु
Jheegu Sah – bishesh, २०७९ बैशाख १४, बुधबार वर्गीकृत समाज
नेवाः विद्यार्थी युनियनया ग्वसालय् व नेवाः जागरण मंच जापानया ग्वसालय् कवि केशरी चित्तधर हृदयया सच्छि झिंन्हयदँया बुँदिया लसताय् क्याम्पस क्याम्पसय् नेपालभाषा ब्वनामि गथे याःसा अप्वयेकेफै धइगु लँपु मालेत छगू चिहा—च्वखँ धेँधेँबल्ला कासा न्ह्याःकुगु दु ।
उगु चिहा—च्वखँ धेँधेँबल्ला कासाय् नेपाः देशय् दुने अले हलिन्यंक च्वनानं मां भाय्यात मतिना यानादिइपि सकलसिनं निसःत्या स्वया अप्वः खँग्वः मछ्यःसे च्वखं नेवाः विध्यार्थी युनियनया नेपालभाषा च्वयातःगु फेसबुक पेजय् अले नेवाः विद्यार्थी युनियनया इमेलय् च्वखँ वर्ड फाइलय् प्रिति/कान्तिपुर फन्टय् ताइप यानातःगु फाइल बाय् पिडिएफ फाइल newavidyarthiunion1140@gmail.com जेष्ठ ११ गते सनिलय् ५ बजे दुनेतक्क छ्वया ब्वति कयादिइफैगु खँ न्ह्यथसें क्याम्पसय् न्हू सत्र शुरु जूइ धुंकुगु जुसां अाः तक्क पद्म कन्या व रत्न राज्यलक्ष्मी क्याम्पसय् नेपाल भाषा विषयया जक कक्षा मजूनिगुयात ध्यानय् तया ब्वनामिपिनिगु ल्याः अप्वयेकेगु लँपु मालेगु कुतः कथं धेँ धेँ बल्ला कासा यानाःगु खँ नेवाः विध्यार्थीया नायः रीदेन महर्जन जानकारी बियादिल ।
लच्छितक्क न्ह्याइगु धेँधेँ बल्ला कासाय् न्हाप लाम्हेसित च्याद्व, ल्यू लाम्हेसित न्याद्व तका अले लियाँल्यु लाम्हेसित स्वद्वतका लिसें उत्कृष्टताय् लाःपिं न्याम्हेसित हपा सिरपाया व्यवस्था दु दुगु खँ थ्व ज्याझ्वःया संयोजन याःगु खलः नेवाः जागरण मंच जापानया संयोजक सुनिल कुमार शाक्यं जानकारी बिया दिल ।
ज्याझ्वःया बारेय् थप जानकारी कयादीमासा विदेशय् च्वनादिपिसं नेवाः जागरण मंच जापानया नायो कृष्ण बदन जोशी +८१ ९०-६४९६-८४६३, छ्याञ्जे : श्याम तन्दुकार+८१ ८०-४४३१-८१३४ अले नेपाःया नीति नेवाः विध्यार्थी युनियनया नायः रीदेन महर्जन ९८४९१३२७८८ व छ्याञ्जे प्रशान्त डंगोल९८५११२१८७३ यात स्वापुतया दिइत नं ग्वसाखलकं इनाप याःगु दु । थ्व कासाय् त्याकादीपिन्त छगू ज्याझ्वः याना सिरपा लः ल्हाइगु खँ दु ।
