आधारभूत पत्रकारिता क्षमता अभिवृद्धि तालिम
Jheegu Sah – Bijay Ratna , २०७९ जेठ १७, मंगलबार वर्गीकृत पुलुपालु
नेवाः पत्रकार राष्ट्रिय दबू येँ जिल्लाया ग्वसालय् आधारभूत पत्रकारिता क्षमता अभिवृद्धि तालिम येँया जगत सुन्दर ब्वनेकुथिइ जुया च्वंगु दु । वंगु आइतवाः येँमपा १५ वडाया नवनिर्वाचित वडाध्यक्ष ईश्वरमान डंगोलं उलेज्या यानादीगु उगु तालिम झिंन्यान्हूतक जुइगु खः । उगु तालिमया उलेज्याझ्वलय् न्ववासें मूपाहाँ डंगोलं पत्रकारिता समाजया न्हाय्कं जूगुलिं सत्यतथ्य पित हयेत पत्रकारतय्सं ध्यान बिइमा धयादिल।
येँ महानगरपालिका सामाजिक विभागया प्रमुख दीपक अधिकारीं जनस्तरलिसे सामाजिक कार्यय् ज्याय् याये खंगुलिं तसकं खुसि लगे जूगु दु धासें थगुनेया बजेटपाखें क्वचायेमाःगु थुगु तालिम कोभिडया हुनिं थुगुसिइ जूवनाच्वंगु खँ न्ह्यथनादिल। पत्रकार दबूया केन्द्रीय नायः सुरजबीर वज्राचार्यं येँ महानगरपालिकानापया सहकार्यं दबूपाखें आपालं समाजिक ज्या याये खंगुलिं महानगरपालिकाया निवर्तमान मेयर विद्यासुन्दर शाक्य, निवर्तमान उपमेयर हरिप्रभा खड्गी श्रेष्ठ नापं सकल महानगर परिवारयात सुभाय् धका धयादिल ।
कोभिडया हे झ्वलय् महानगरपाखें उपलब्ध जूगु ग्वाहालिया कारणं यक्व हे पत्रकार सहकर्मिपिंत तःधंगु ग्वाहालि जूवंगु खँ वज्राचार्यं न्ह्यथनादिल। नापं नेवाः पत्रकार कल्याणकारी कोषया निंतिं महानगरं बिया वयाच्वंगु ग्वाहालि निरन्तरता जुइमा धकाः नं वय्कलं बः बियादिल। ज्याझ्वलय् मुख्य प्रशिक्षक वरिष्ट पत्रकारहरु नेपालभाषा टाइम्स न्हिपौया सम्पादक सुरेशकिरण मानन्धरं सूचना तथा सञ्चारया महत्वया बारे जानकारी बियादिल।
वय्कलं थौंया युगय् सूचना तथा सञ्चारया गुलितक महत्व दु धकाः वंगु वैशाख ३० गते जूगु चुनावपाखें सकसितं जानकारी दये धुंकल जुइ । छुं नं कथंया राजनीतिक पार्टीया उम्मेदवारया पम्प्लेट, पर्चा, पोस्टर विना छुं नं पार्टीपाखें छु पदय् सु उम्मेदवार चुनावी मैदानय् दु धयागु आम जनतायात थ्व हे सूचना तथा सञ्चारया माध्यमपाखें जानकारी दुगु प्रमुख प्रशिक्षक सुरेश किरणं धयादिल। ज्याझ्वःया सभापति पत्रकार दबू येँं जिल्लाया नायः अर्विन्द्रमान सिंहं भाषा, कला, साहित्य, संस्कृतिया उत्थान धइगु हे समग्र जातीया उत्थान खः, व जातीया उत्थान धइगु हे देश विकासया लँपु जूगु धयादिल ।
वहे मान्यता कथं नेवाः पत्रकार राष्ट्रिय दबू, येँ जिल्लां समग्र नेवाःलगायत आम नेपालीतय्त सचेतनाया विकास यायेगु उद्देश्यसहित थीथी ज्याझ्वःया ग्वसाः ग्वया वयाच्वनागु धयादिल।
