arin JS
Home page Ad

आदिबासी दिवसया लसताय् संकिपा क्यनेज्या व सांंस्कृतिक ज्याझ्वः

Jheegu Sah – Bijay Ratna ,    २०७९ श्रावण २१, शनिबार    वर्गीकृत मनोरञ्जन

           नीच्याक्वःगु विश्व आदिबासी दिवसया लसताय् नेपाल आदिबासी जनजाति चलचित्र महासंघ व राष्ट्रिय आदिबासी जनजाति महिला मञ्च (निफ) या ग्वसालय् शुक्रबार आदिबासी जनजाति संकिपा क्यनेज्या व  सांंस्कृतिक ज्याझ्वः याःगु दु ।
 
शुक्रबार पर्यटन बोर्डया हलय् जुउगु उगु ज्याझ्वलय् संघीय मामिला तथा सामान्य प्रशासनमन्त्री राजेन्द्रप्रसाद श्रेष्ठ मूपाहाँ कथं झायादीगु खः । मूपाहाँ मन्त्री श्रेष्ठं छगू संकिपा दुनेया विषयवस्तु, संवाद व पात्रया नामं मनूया सोच, सामाजिक व्यबहार व थाय्बायया नां तकं हिलावंगु दु धका धयादिसे  येँया फिब्वख्यःया नां  माइतिघर संकिपाया अफिस दुउगु कारणं हिलावंगु खँ कनादिल । संकिपाय् थथे तागत दुउगु जुगुलिं आदिबासी जनजाति मातृभाषा या संकिपा दयेकिबले पहिचान, अस्तित्व व आन्दोलनयात सशक्त यायेत सावधानीपूर्वक संकिपा निर्माण यायेत आदिबासी संकिपामि पिन्त इनाप यानादिल ।
 
 उगु ज्याझ्वलय् नेपाल आदिबासी जनजाति महासंघ, संघीय परिषदया नायः गेल्जे लामा शेर्पा, आदिबासी जनजाति महिला महासंघया मूछ्यान्जे शान्ति देवान, राष्ट्रिय आदिबासी जनजाति महिला मञ्चया नकिं सुनी लामा, आदिबासी जनजाति चलचित्र महासंघया अध्यक्ष अमृत सुनुवार, नेपाल आदिबासी जनजाति पत्रकार महासंघ (फोनिज) या संघीय न्वकु अमरध्वज लामा, चलचित्र कलाकार संघया नायः रविन्द्र खड्का , नेपाल चलचित्र संघया न्वकु गोपालकाजी कायस्थ , नेवाः फिल्म सोसाइटीया नायः विराजकाजी राजोपाध्याय लगायतया वक्तापिन्सं आदिबासी जनजाति समुदायया भाय् , तजिलजि या विषयवस्तु कःघाना संकिपा दयेकेमागु खँया चर्चा यानादिल ।
 
नेपाल पर्यटन बोर्डया सभाहलय् जुउगु ज्याझ्वलय् लसकुस प्याखं कथं कुमारी चचा प्याखंया नापनापं तामाङ, थामी, थारू, सुनुवार समुदायया कलाकारपिन्सं सांंस्कृतिक ज्याझ्वः न्ह्यब्वःगु खः । अथेहेतुं उगु ज्याझ्वलय् गुरूङ भायया सांस्कृतिक संकिपा " मि न्होर्वे ट" नं क्यंगु खः । 
Detail page ad